پراگ بالی ووڈ اداکارہ پریانکا چوپڑا کے شوہر، گلوکار نک جوناس، پراگ میں ایک کنسرٹ کے دوران خود پر لیزر لائٹ دیکھ کر خوفزدہ ہو کر اسٹیج سے بھاگ گئے۔ اس واقعے کے دوران، ایک شخص نے ان پر لیزر لائٹ سے نشانہ لگایا، جس کی وجہ سے نک کو سیکیورٹی کے خطرے کا احساس ہوا۔ وہ فوراً اسٹیج سے نیچے اترے اور اپنی سیکیورٹی ٹیم کو آگاہ کیا۔
اس واقعے کے وقت نک کے بھائی، جو اور کیون، بھی اسٹیج پر موجود تھے، لیکن نک کے بھاگنے کے باوجود وہ وہاں رہے۔ سیکیورٹی اہلکاروں نے فوراً اس شخص کو تلاش کر کے پنڈال سے ہٹا دیا۔ اس واقعے کی وجہ سے شو کچھ دیر کے لیے روکنا پڑا۔
نک جوناس کے خوفزدہ ہو کر اسٹیج سے اترنے کی ویڈیو کئی فین پیجز پر شیئر کی گئی۔ ایک فین پیج نے لکھا، "جوناس برادران کو آج رات پراگ میں اپنا شو مختصر وقت کے لیے روکنا پڑا، جب حاضرین میں سے کسی نے نک کی طرف لیزر سے نشانہ لگایا۔ اس شخص کو وہاں سے ہٹا دیا گیا اور شو دوبارہ جاری ہوا۔ مجھے خوشی ہے کہ نک اور باقی سب محفوظ ہیں۔”
