پاکستان کے سینئر اداکار فردوس جمال کے بیٹے نے والد کے فیملی چھوڑ دینے کے بیان کے بعد والدہ کی جانب سے خلع لینے کا انکشاف کیا ہے۔
فردوس جمال نے حال ہی میں یوٹیوب اور ڈیجیٹل کانٹینٹ کری ایٹر عنبرین فاطمہ کو ایک انٹرویو دیا، جس میں انہوں نے بتایا کہ وہ اپنے خاندان کو چھوڑ کر تنہائی میں چلے گئے ہیں۔
بشری انصاری نے فردوس جمال کے متنازع بیان کی حقیقت بیان کی۔
فردوس جمال نے اس انٹرویو میں فیملی کے حوالے سے متعدد باتیں کیں، جس کے بعد ان کے بیٹے اور اداکار حمزہ فردوس نے ایک ویڈیو بنا کر کہانی کا دوسرا رخ عوام کو دکھاتے ہوئے والدہ کی خلع کا انکشاف کیا۔
حمزہ فردوس نے کہا، "یہ ویڈیو میں بہت درد کے ساتھ بنا رہا ہوں۔ کاش مجھے یہ ویڈیو نہ بنانی پڑتی۔ میرے والد کی چند ویڈیوز سوشل میڈیا پر وائرل ہو رہی ہیں، اور باحیثیتِ بیٹا آپ کی یہی کوشش ہوتی ہے کہ آپ کے گھر کی باتیں باہر نہ آئیں۔ جب آپ کو آپ کے ناکردہ گناہوں کی سزا مل رہی ہوتی ہے تو پھر آپ کو بات کرنی پڑتی ہے۔”
انہوں نے کہا، "سب سے پہلے تو میں یہاں اپنی والدہ کی جانب سے یہ اعلان کرنا چاہتا ہوں کہ وہ میرے والد سے خلع لے چکی ہیں۔”
حمزہ نے مزید کہا، "ایک عورت جب 35، 40 سال گزار دے تو وہ کبھی یہ دن دیکھنا نہیں چاہتی۔ تکلیفیں، مصیبتیں، اذیتیں سب سہے، اس امید میں کہ ایک دن سب ٹھیک ہو جائے گا۔ لیکن ہمارے کیس میں بد سے بدتر ہوتا چلا گیا۔”
انہوں نے کہا، "میڈیا کے لوگوں کو اس بارے میں علم ہے، عوام کو نہیں پتا تو اللہ نے پردہ رکھا ہوا ہے۔ انسان کی کچھ بُری حرکات ہوتی ہیں جن کی وجہ سے دوسروں کو تکلیف پہنچ رہی ہوتی ہے۔ جب آپ کو تکلیف ہوتی ہے تو پہلے اس کی شکایت کرتے ہیں، پھر دھاڑے مار مار کر روتے ہیں کہ ہمیں تکلیف ہورہی ہے۔”
حمزہ نے مزید کہا، "جب فردوس جمال کو کینسر ہوا تو یہ بہت تکلیف دہ عمل تھا۔ ان کی دوائیوں کا خرچ بیٹے نے اٹھایا۔ اگر کوئی یقین نہ کرے تو ریسیپٹس بھی دکھا سکتا ہوں، لیکن سوشل میڈیا پر ایسے بتایا جا رہا ہے جیسے ان کی بیماری میں ان کو چھوڑ دیا گیا۔”
انہوں نے کہا، "ہم نے اور والدہ نے بہت کوشش کی کہ یہ باتیں باہر نہ آئیں لیکن ایسا نہ ہوسکا۔ والد نے ساری زندگی اپنی شرائط پر گزاری ہیں۔ میرے چاچا کی جانب سے ہمیں مارنے کی دھمکیاں ملیں، لیکن ہم کھڑے ہوئے ہیں۔”
حمزہ نے کہا، "میرے والد سے آپ یہ حلف اٹھوالیں کہ کیا میں نے انہیں یہ نہیں کہا کہ آپ کو کام کرنے کی ضرورت نہیں۔ میں بہت پردوں میں رہ کر بات کر رہا ہوں کیونکہ میری والدہ نے مجھے تاکید کی ہے کہ بیٹا سوچ کر باتیں کرنا۔”
