پاکستانی اداکارہ و ماڈل اریج چوہدری نے حال ہی میں ایک نجی ٹی وی کے مارننگ شو میں شرکت کی جہاں انہوں نے سوشل میڈیا پر منفی ردعمل اور ڈراموں میں منفی کردار ادا کرنے کے حوالے سے بات کی۔ اریج چوہدری کا کہنا تھا کہ سوشل میڈیا پر لوگوں کی جانب سے گالیاں اور بد دعائیں ملتی ہیں، خاص طور پر جب وہ منفی کردار ادا کر رہی ہوتی ہیں۔
اریج چوہدری نے اس بات کا بھی ذکر کیا کہ ان کی حقیقی شخصیت بہت مثبت ہے اور وہ جن چیزوں کے خلاف ہیں، وہی چیزیں منفی کردار میں دکھائی دیتی ہیں، اس لیے ایسے کردار کو سمجھنا اور اس پر کام کرنا ان کے لیے چیلنج ہوتا ہے۔ انہوں نے کہا کہ "ڈرامے میں ایک میاں بیوی کے تعلقات کو خراب کرنے کا کردار ادا کرنا میرے لیے ایک نیا تجربہ تھا، اور میں خود بھی اس بات پر سوچتی تھی کہ میں کیا کر رہی ہوں۔”
اداکارہ نے مزید کہا کہ سوشل میڈیا پر لوگوں کا ردعمل شروع میں منفی ہوتا ہے، لیکن جب لوگ ان سے ذاتی طور پر ملتے ہیں تو ان کا نظریہ تبدیل ہو جاتا ہے۔ وہ کہتی ہیں، "جب تک لوگ مجھ سے نہیں ملتے، وہ مجھے گالیاں دیتے ہیں، لیکن جب وہ میری حقیقی شخصیت سے آشنا ہوتے ہیں تو وہ کہتے ہیں کہ آپ ایسی نہیں لگتی ہیں۔”
اریج چوہدری نے اپنے کیریئر میں متعدد مشہور ڈراموں میں اہم کردار ادا کیا ہے، جن میں "کبھی میں کبھی تم”، "وہ پاگل سی”، "ترک وفا”، "ڈھائی چال” اور "جنٹلمین” شامل ہیں۔ اس کے علاوہ، اریج چوہدری نے بین الاقوامی بیوٹی مقابلوں میں بھی شرکت کی ہے اور پاکستان کی نمائندگی کی ہے۔
