سعودی فٹبال کلب النصر کے سابق گول کیپر اور رونالڈو کے ساتھی فٹبالر نے انکشاف کیا ہے کہ کرسٹیانو رونالڈو اسلام قبول کرنا چاہتے ہیں۔
ایک ٹی وی شو میں گفتگو کرتے ہوئے سعودی فٹبالر ولید عبداللہ، جو کہ رونالڈو کے کلب النصر میں سابق گول کیپر بھی تھے، نے کہا کہ رونالڈو اسلام کی تعلیمات اور سعودی عرب کی ثقافت میں گہری دلچسپی رکھتے ہیں۔
ولید عبداللہ نے بتایا کہ رونالڈو واقعی اسلام قبول کرنے کی خواہش رکھتے ہیں، اور اس حوالے سے وہ مجھ سے بات بھی کر چکے ہیں، جس میں انہوں نے اپنی دلچسپی کا اظہار کیا۔
سعودی فٹبالر نے مزید کہا کہ النصر میں رونالڈو نے گول کرنے کے بعد میدان میں سجدہ بھی کیا اور ہمیشہ اپنے ساتھی کھلاڑیوں کو نماز پڑھنے اور اسلامی روایات کی پیروی کرنے کی ترغیب دیتے ہیں۔
انہوں نے یہ بھی انکشاف کیا کہ جب بھی ٹریننگ کے دوران اذان ہوتی ہے، رونالڈو اپنے کوچ سے درخواست کرتے ہیں کہ ٹریننگ کو روکا جائے تاکہ ان کے ساتھی کھلاڑی نماز ادا کر سکیں۔
یہ بھی یاد رہے کہ مئی 2023 میں، جب رونالڈو نے النصر کے لیے گول کیا، تو انہوں نے میدان میں سجدہ کیا، اور اس وقت ٹیم کے تمام کھلاڑیوں نے ایک ساتھ "اللہ اکبر” کا نعرہ لگایا۔
ولید عبداللہ نے یہ بھی کہا کہ چاہے رونالڈو اسلام قبول کریں یا نہ کریں، ان کا ڈسپلن اور محنت ہی انہیں اس مقام تک لے آیا ہے، اور سعودی عرب آنے والے ہر شخص پر رونالڈو کا اثر پڑتا ہے۔
یاد رہے کہ جنوری 2023 میں رونالڈو اور سعودی کلب النصر کے درمیان ڈھائی سالہ معاہدہ طے پایا تھا، جس کے تحت النصر کلب نے انہیں 21 کروڑ 30 لاکھ ڈالرز معاوضہ ادا کرنا ہے۔
