کراچی:
سانحہ 12 مئی کے مقدمات میں عدالت نے تفتیشی افسر کو طلب کرتے ہوئے گواہوں کو پیش کرنے کا حکم دے دیا۔
انسداد دہشت گردی کی خصوصی عدالت نے سانحہ 12 مئی کے پانچ مقدمات میں تفتیشی افسر کو آئندہ سماعت پر طلب کرتے ہوئے گواہوں کو بھی پیش کرنے کا حکم دیا ہے۔
سینٹرل جیل کراچی کے انسداد دہشت گردی کمپلیکس میں خصوصی عدالت کے روبرو سانحہ 12 مئی کے پانچ مقدمات کی سماعت ہوئی۔ کیس میں ایم کیو ایم لندن کے رئیس مما، رضوان چپاتی اور دیگر کے خلاف پولیس کی عدم توجہی برقرار رہی، جب کہ تفتیشی افسر انسپکٹر طیب کی مسلسل غیر حاضری سے مقدمہ التوا کا شکار ہو رہا ہے۔
دوران سماعت عدالت تفتیشی افسر کی عدم پیشی پر سخت برہم ہوئی اور تفتیشی افسر کو آئندہ سماعت پر طلب کر لیا۔ عدالت نے تفتیشی افسر کو گواہوں کو بھی پیش کرنے کا حکم دیا اور کہا کہ عدم پیشی اور عدالتی حکم عدولی پر سخت کارروائی کی جائے گی۔ بعد ازاں سماعت 9 دسمبر تک ملتوی کر دی گئی۔
پولیس کے مطابق 12 مئی 2007 کو کراچی میں دہشت گردی، ہنگامہ آرائی اور قتل و غارتگری کی گئی تھی۔ مقدمہ تھانہ ایئر پورٹ میں درج ہے، اور اس میں ایم کیو ایم لندن کے رئیس مما اور رضوان چپاتی گرفتار ہیں۔
