پاکستان کرکٹ بورڈ (پی سی بی) نے جنوبی افریقا کے خلاف پہلے ٹیسٹ کے لیے پلیئنگ الیون کا اعلان کر دیا
پاکستان کرکٹ ٹیم جنوبی افریقا کے خلاف پہلے ٹیسٹ میچ کے لیے میدان میں اترے گی، اور اس میں چار فاسٹ بولرز شامل ہوں گے۔ تجربہ کار فاسٹ بولر محمد عباس کی پلیئنگ الیون میں واپسی ہوئی ہے، جو آخری بار اگست 2021 میں ویسٹ انڈیز کے خلاف ٹیسٹ میچ میں کھیل چکے تھے۔
محمد عباس نے اس سیزن میں قائداعظم ٹرافی کے پانچ میچوں میں 31 وکٹوں کی شاندار پرفارمنس دکھائی، جس کی بدولت وہ ٹیسٹ اسکواڈ میں شامل ہوئے ہیں۔
پلیئنگ الیون:
کپتان شان مسعود، صائم ایوب، بابر اعظم، کامران غلام، محمد رضوان، سعود شکیل، سلمان علی آغا، عامر جمال، نسیم شاہ، خرم شہزاد اور محمد عباس شامل ہیں۔
پاکستان اور جنوبی افریقا کے درمیان دو ٹیسٹ میچوں کی سیریز کل سے شروع ہو رہی ہے۔ پہلا ٹیسٹ سنچورین کے سپر اسپورٹس پارک میں کھیلا جائے گا، جو باکسنگ ڈے ٹیسٹ میچ ہوگا، جبکہ دوسرا ٹیسٹ 3 جنوری کو کیپ ٹاؤن میں ہوگا۔
پاکستان ٹیم نے حال ہی میں جنوبی افریقا کے خلاف ٹی ٹوئنٹی سیریز میں 2-0 سے شکست کھائی، لیکن ون ڈے سیریز میں جنوبی افریقا کی سرزمین پر 3-0 کا تاریخی وائٹ واش کیا۔ اسی لیے توقع کی جا رہی ہے کہ آئی سی سی ورلڈ ٹیسٹ چیمپئن شپ کی یہ سیریز بھی دلچسپ اور سخت ہو گی۔
پاکستان ٹیم نے اپنی آخری ٹیسٹ سیریز شان مسعود کی قیادت میں انگلینڈ کے خلاف 2-1 سے جیتی تھی۔
پاکستان ٹیسٹ اسکواڈ:
شان مسعود، سعود شکیل، عامر جمال، عبداللہ شفیق، بابر اعظم، حسیب اللہ (وکٹ کیپر)، کامران غلام، خرم شہزاد، میر حمزہ، محمد عباس، محمد رضوان (وکٹ کیپر)، نسیم شاہ، نعمان علی، صائم ایوب اور سلمان علی آغا شامل ہیں۔
