عمران خان کی نااہلی پر احتجاج: علی امین گنڈاپور اشتہاری قرار
اسلام آباد کی انسدادِ دہشت گردی عدالت میں تحریک انصاف کے چیئرمین عمران خان کی نااہلی پر ہونے والے احتجاج سے متعلق کیس کی سماعت ہوئی۔ سماعت جج طاہر عباس سپرا نے کی، جس میں پی ٹی آئی رہنما فیصل جاوید اور واثق قیوم عدالت میں پیش ہوئے۔
عدالت نے سماعت کے دوران خیبر پختونخوا کے سابق وزیر اعلیٰ علی امین گنڈاپور اور عمر تنویر بٹ کو اشتہاری قرار دیا۔ مزید یہ کہ عامر کیانی کے خلاف بھی اشتہاری قرار دینے کا عمل شروع کر دیا گیا۔
سماعت کے دوران فیصل جاوید نے دہشت گردی کی دفعات کو ختم کرنے کی درخواست بھی دائر کی۔ عدالت نے کیس کے غیر حاضر ملزمان کے وارنٹ گرفتاری جاری کر دیے اور کیس کی مزید سماعت 15 جنوری تک ملتوی کرتے ہوئے دائر درخواستوں پر دلائل طلب کر لیے۔
واضح رہے کہ یہ مقدمہ تھانہ آئی-9 میں 2022 میں درج کیا گیا تھا۔
